Seis deportistas de ASPAS participaron esta fin de semana nos XXI Xogos Autonómicos de Deportes Minoritarios, organizados por Special Olympics Galicia en colaboración con Fademga e promovidos pola nosa asociación. O Multiusos Fontes do Sar acolleu esta cita na que os nosos seis membros, María José Botana, Sandra Castro, José Antonio Brea, Felipe Varela, Francisco Losada e Olivier Cantero, disputaron a modalidade de tenis de mesa e disfrutaron dunha xornada de deporte, integración e compañeirismo.

 

Os xogos contaron coa participación de 23 asociacións, que desprazaron un total de 377 deportistas con discapacidade intelectual e 99 adestradores e adestradoras. Ademais, participaron 105 voluntarios. A xornada deportiva inaugurouse ás 10:45 horas co habitual desfile de deportistas das entidades participantes, e finalizou ás 19:00 horas co acto de clausura. 

 

Ademais do tenis de mesa, houbo competición de bádminton, petanca, e probas motrices adaptadas de desprazamento, tiro de disco, recepción de pelotas, lanzamento a canastra, lanzamento de precisión, tiro a portería, raquetas e pelotas, equilibrio dinámico, desprazamento con diferentes apoios e bolos.