Tres deportistas de ASPAS participaron esta fin de semana na XVII edición dos Xogos Autonómicos de Atletismo, organizados por Special Olympics Galicia en colaboración con Fademga Plena Inclusión Galicia e promovidos pola Asociación San Francisco. 

 

No evento, celebrado nas pistas do estadio vigués de Balaídos, Alberto Gómez e Felipe Varela finalizaron en cuarta e sexta posición respectivamente na proba de 400 metros, mentres que Jesús Cabo completou a participación de ASPAS coa terceira praza na carreira de 1.500 metros. 

 

A competición atlética reuniu en Vigo a deportistas con discapacidade intelectual, adestradores e voluntarios de toda Galicia. Os xogos seguiron as regras básicas dos eventos organizados por Special Olympics establecéndose tres niveis de participación en función dos coñecementos que os deportistas teñen das regras, así como das súas capacidades físicas. Ademais das carreiras mencionadas, disputáronse probas de velocidade, medio fondo, fondo, salto de lonxitude, salto de altura, lanzamento de peso, marcha, marcha asistida ou lanzamento de bóla (softball), entre outros.