Membros da Asociación ASPAS compartiron este venres unha xornada de sendeirismo en Compostela con persoas con discapacidade intelectual das asociacións Amipa e Aspadeza xunto a voluntarios da Fundación Telefónica, que celebraba o seu Día Internacional do Voluntario Telefónica. A actividade, organizada por Special Olympics Galicia en colaboración con Fademga consistiu nunha ruta a pé de 5 quilómetros percorrendo diferentes parques e zonas verdes da capital galega.

 

Os 15 atletas das tres entidades, acompañados por 5 adestradores e polos voluntarios, comezaron a xornada ás 10.30 horas na Alameda. A continuación a expedición dirixiuse ao Parque de Vista Alegre para logo seguir camiño polo Parque de Galeras e o Campus Sur. A ruta rematou na Alameda, onde os participantes recibiron un agasallo, e posteriormente pechouse a xornada cunha comida de confraternización.