Os usuarios de ASPAS asistiron durante o mes de maio ao obradoiro de prevención de condutas delitivas "Pensa por ti" impartido por FADEMGA Plena Inclusión Galicia. Esta actividade ten como obxectivo previr posibles condutas de risco de cometer delitos en persoas con discapacidade intelectual.

 

O obradoiro constou de catro sesións de dúas horas nas que participaron un total de 12 persoas de ASPAS. Nelas recibiron formación nos seguintes aspectos: coñecer a Convención dos dereitos das persoas con discapacidade; o acceso á Xustiza; coñecer e comprender que é un delito ou falta; estratexias de prevención de situacións que dean lugar á comisión de delitos; consecuencias da comisión de feitos delituosos; como actuar ante un procedemento policial-xudicial; e coñecer experiencias reais. 

 

O obradoiro "Pensa por ti" levouse a cabo en diferentes entidades de FADEMGA tras a difusión do documental "A cada lado" sobre o programa realizado nos centros penitenciarios con persoas con discapacidade intelectual e a súa vida no cárcere. Ante o risco de que houbese usuarias e usuarios en risco de cometer algún delito, programouse esta formación como actividade preventiva.