Os usuarios de ASPAS asisten durante o mes de xuño ao curso de educación afectivo-sexual Quiere-te, no que se lles proporciona a información axeitada para facer fronte a todas as situacións relacionadas con estes campos. 

 

Deste xeito, os obxectivos da actividade son que as persoas con discapacidade intelectual sexan capaces de coñecer e xestionar de maneira autónoma os seus sentimentos; aprender a coñecer os seus corpos para unha vivencia saudable da sexualidade; aumentar as habilidades de relación, autoeficacia e asertividade dos participantes para a realización dun sexo máis seguro; saber dicir que non; proporcionar información axeitada sobre sexualidade e relacións para evitar os riscos que supoñen os mitos e tabús; modificar actitudes e favorecer medidas de prevención;e aprender a recoñecer as situacións de risco do comportamento sexual.

 

A formación realizase en varias sesións con tres grupos diferentes con dúas monitoras expertas na materia. Utilízanse técnicas de grupo, xa que son as máis eficaces para facilitar cambios de conduta axeitados, ademais de facilitar a interacción para incidir sobre os coñecementos e condutas de cada grupo ao que vai dirixida a formación. Así, os usuarios participan en treboadas de ideas, traballo en pequenos grupos, discusións dirixidas, modelaxes ou xogos de roles.

 

En ASPAS consideramos que unha integración e normalización axeitada do colectivo de persoas con discapacidade intelectual debe incluír a sexualidade como elemento prioritario de atención. A transcendencia que comporta a sexualidade fai que se teñan que tomar decisións sobre este aspecto. Para facilitalo, precisan unha educación sexual e afectiva que lles axude a ter autonomía para protexerse dos riscos asociados á actividade sexual. O contrario supón incrementar estes riscos, xa que a ignorancia failles ser moito máis vulnerables.